Vereinsgschicht
Sit lengerer Zyt han i u mini Schwoscht d`Regula dr Wunsch gha, e chlini Jodlergruppe uf d Bei z steuä. Auso hi mir üs uf d Suechi nach motivierte Lüt gmacht, wo chönnte Fröid am gmeinsame singe u jodle ha.
Mit em Sprüchli:" Chumm doch mau unverbindlech cho icheluege u wisch, mir probe nume au zwo Wuche hi mir gly es paar Lüt chönne gluschtig mache.
Nachdäm auso di Suechi erfougrich isch gsy hett sech d Frag gsteut, wär üs chönnti leite.
Aus Dirigäntin hei mir d Astrid Hänni us Riggisberg chönne gewinne.
So het sech am 16. Januar 2006 es chlises Tschüppli zur 1. Singprob im Chindergarte Gerzensee troffe. Nach däm Abe hi mir beschlosse au 14 Tag zäme z`probe u nadisnah verschidnegi Lieder z`lehre.
Mit ere unheimliche Geduld het d Astrid di Lüt chönne motiviere für ds singe u ds üebe.
Uf dr Suechi nacheme geignete Name hi mir üs gly druf chönne einige, dass mir üs nach em höchschte Punkt vom Belpberg wei benennä. Dr Chutze isch fasch für aui e chly dr Huusbärg u vo dert us gseht me wyt über ds Ländli i.
Nach über eme Jahr, hei mir du auso am 17. März 2007 d`Chutzejodler Gerzensee offizieu bim „Chutzelingli“ gründet. Glichzitig si mer o im Bärner Kantonale Jodlerverband wi dr Gürbetalische Jodlervereinigung biträte.
Am 5. Oktober 2008 hi mir üses Gründigskonzärt ir Chiuche z Gerzensee gfiiret.
Nach em Gründigskonzärt hi mir scho uf d Suechi nach ere nöie Leitig müesse.
Mit em Stefan Nauer us Zollikofen hi mir e Vollträffer glandet. Er leitet üs mit ere grosse Motivation u isch für üs zumene guete Fründ worde, wo hoffentlech no lang bi üs blibt.
I denä Jahr hi mir e huufe schöni Uftritte gha u scho so mängs luschtigs zäme chönne erläbe.
Us sehr ungerschidleche Gründ hei üs leider 5 Gründungsmitglieder im 2012 verlah.
O mir sy auso nid vo Rückschleg verschont blibe u da hi mir haut ume uf d Suechi müsse.
Mit grosser Fröid hi mir aber sofort ume nöii Sängerinne u Sänger dörfe begrüesse.
Dank üsem kompetänte Dirigänt hi si sofort chönne bi üsne Uftritte mit derby sy.
Am Eidg. Jodlerfescht z Davos im 2014 hi mir ds erschte Mal d Beschtnote 1 erreicht,
das isch für üs eifach wäuts schön gsy u dir gloubet nid wi das üs het gfröit!
Mir hoffe i Zuekunft no mängisch chönne zämä z`stah u viu zfridnegi u gfröiti Stunge chönne z gniesse!
Vilech gseh mir ja o di einisch bimene Uftritt oder vilech bruchsch sogar mau e Jodlergruppe wo zu dir a nes Feschtli chunnt cho singe. Das würd üs sehr fröie.
Öii Chutzejodler Gerzensee